Haurren garapena eta hezkuntza sistema. Zein testuigurutan haziko eta heziko da?
Haurren garapen emozionalari, sozialari eta kognitiboari bagagozkie, umeen lehen urteak funtsezkoak direla esan genezake. Haurrak Hezkuntza sistemara ematen duen lehen pausoa mugarri garrantzitsua izaten da.
Hazkuntza eta hezkuntzari begira.
Testuinguruaz ari garela, eta seguruenik buruan galdera bera zerabiltela, 1977an, euren seme-alaben hezkuntzaren testuinguruaz kezkatuta, eta beronek hauspotuta, Amurrioko guraso talde batek Aresketa Ikastola sortu zuen. Ia 50 urteko ibilbide honetan, herritik eta herriarentzat sortua, euskararen eta euskal kulturaren biziberritzea ardatz izanik, belaunaldiz belaunaldi etorkizunari begira eraikitako proiektu sendoa gara, gure haurren hazkuntza eta hezkuntzari begira erantzunen bila etengabean jarduten duen ikasle, familia, irakasle eta langileok osatutako komunitate bizia, azken batean, familia handi bat.
Testuinguruak
2 eta 16 urte bitarteko hezkuntza ibilbide osoa eskaintzen duen ikastola gara, nortasun propioa duen proiektu egonkorrarekin.
Haur Hezkuntza (2-5 urte bitarteko etapa): umearen erritmoa errespetatzea da gure lanaren ardatza. Haurtzaroa oso garai sentikorra da, arreta berezia eskatzen duena. Gurean, haurra bere prozesuaren erdigunean dago eta, bereziki adin hauetan, ez dugu ulertzen hezkuntza “gauzak irakaste huts gisa”. Haurrak bere kabuz ikasteko gaitasuna du, eta helduon egitekoa ingurune egokia eskaintzea da: espazio seguruak eta harreman beroak eguneroko errutinak zainduz. Lehen helburua ziurtasuna da. Haur batek konfiantza sentitzen duenean, ausartzen da esploratzen, jolasten eta harremanak eraikitzen. Horretarako, irakasle talde egonkor eta esperientziaduna dugu, lotura afektibo horiek zaintzen dituena.
Lehen Hezkuntza (6-11 urte bitar-teko etapa): ikasleek autonomiarako lehen urratsak ematen dituzte: eduki akademikoez haratago jakinmina, erantzukizuna eta lankidetza lantzen dira.
Derrigorrezko Bigarren hezkuntza (12-16 urte bitarteko etapa): Lehen Hezkuntzan jorratutako autonomia horrek sakontasuna hartzen du; ikasleek pentsamendu kritikoa garatzen dute eta etorkizunari begira jartzen dira.
Helburuak
Gure jomuga honako hau da: DBH amaitzean ikasle bat bera ere ez dadin ikastolatik bizi proiekturik gabe atera. Horretarako, tutoreak, irakasleak eta orientatzaileak bidelagun dira hazkuntza eta hezkuntza bide luze honetan. Aresketa ikastolan ez dugu uste, finean, heztea etapa akademikoak gainditze hutsa denik; pertsona osoak heztea da, gizartean beren tokia aurkitzeko prest egongo diren herritarrak.
Euskara
Euskara da gure oinarria eta eus-karak bizirik iraun dezan “taupa-dak berpiztu” behar ditugu, baina ateak zabalik ditugu jatorri, kultura eta hizkuntza anitzeko familientzat, kulturartekotasuna aberastasun gisa ulertzen baitugu, eta, elkarbizitza errespetuz eta naturaltasunez landuz egunerokoan.
belaunaldiz belaunaldi etorkizunari begira erai-kitako proiektu sendoa gara.
Nora goaz?
Garai nahasi hauetan heztea ez da erraza eta, hortaz, gure seme-alabak hazten ari direneko mundua, gizarte hipermoderno honek haiengan eragiten dituen eskakizunei eta haien bizitzei zentzu bat emateko beharrei erreparatzen diegu (kezkak eta aurrera begirako etengabeko jardun horrek urtero antolatzen ditugun “Hezkuntza Jardunaldi Irekiak” antolatzera garamatza, zeinetan etengabeko prestakuntza bilatzen dugun.
